National

ಇದುವರೆಗೂ ಹುತಾತ್ಮ ಯೋಧರ ಕುಟುಂಬಕ್ಕೆ 4500 ಪತ್ರಗಳನ್ನು ಬರೆದಿರುವ ಈ ಅಪರೂಪದ ವ್ಯಕ್ತಿಯ ಬಗ್ಗೆ ನಿಮಗೆ ಗೊತ್ತೇ?

ರಾಜಸ್ಥಾನದ ಜಿತೇಂದ್ರ ಸಿಂಗ್ ಗುರ್ಜರ್ ಅವರದು ಅಪರೂಪದ ವ್ಯಕ್ತಿತ್ವ.‌ ತಮ್ಮ ಜೇಬಿನಿಂದ ಬಾಚಣಿಗೆಯನ್ನು ತೆಗೆದು ಮೀಸೆಯ ಮೇಲೆ ಆಡಿಸಿ ನಂತರ ಮೀಸೆಯನ್ನು ಸರಿಪಡಿಸಿಕೊಳ್ಳುವುದನ್ನು ನೋಡಿ ಎಂಥವರೂ ಆಕರ್ಷಿತರಾಗುತ್ತಾರೆ.‌

ಜಿತೇಂದ್ರ ಸಿಂಗ್ ಗುರ್ಜರ್ ತನ್ನ ತಂದೆಯಂತೆ ಸೈನಿಕರಾಗಬೇಕೆಂಬ ಆದರ್ಶವನ್ನು ಹೊಂದಿದ್ದರು. ಆದರೆ ಸೈನಿಕನಾಗಲು ಇರಬೇಕಿದ್ದ ಎತ್ತರ ಅವರಿಗಿರಲಿಲ್ಲವೆಂದು ಅವರನ್ನು ತಿರಸ್ಕರಿಸಲಾಗಿತ್ತು. ಇದಾದ ನಂತರ ಜಿತೇಂದ್ರ ಅವರು ಕಾವಲುಗಾರರಾಗಿ ಕೆಲಸಕ್ಕೆ ಸೇರಿದ್ದು. ಕಾವಲುಗಾರನ ಸಮವಸ್ತ್ರವನ್ನು ತೊಟ್ಟು ಥೇಟು ಸಿಪಾಯಿಯಂತೆ ಶಿಸ್ತಿನಿಂದ ತನ್ನ ಕೆಲಸವನ್ನು ನಿಭಾಯಿಸುತ್ತಿದ್ದಾರೆ ಜಿತೇಂದ್ರ ಅವರು.‌ ‘ಈ ಸಮವಸ್ತ್ರದಲ್ಲಿ ನಾನು ಸೈನಿಕ ಎಂಬ ಭಾವನೆ ನನಗೆ ಬರುತ್ತದೆ’ ಎನ್ನುತ್ತಾರೆ ಗುರ್ಜರ್ ಅವರು. ಸೇನೆಯೆಡೆಗಿನ ಅವರ ಪ್ರೀತಿ ಅಪಾರವಾದುದು.

39 ವರ್ಷದ ಗುರ್ಜರ್ ಅವರು ಕಳೆದ 20 ವರ್ಷಗಳಿಂದ ಹುತಾತ್ಮ ಸೈನಿಕರ ಕುಟುಂಬದವರಿಗೆ ಪತ್ರಗಳನ್ನು ಬರೆಯುತ್ತಿದ್ದಾರೆ. 1999 ರ ಕಾರ್ಗಿಲ್ ಯುದ್ಧದ ಸಂದರ್ಭದಲ್ಲಿ ರಾಜಸ್ಥಾನದ ಭರತ್‌ಪುರ ಜಿಲ್ಲೆಯ ಕುತ್‌ಖೇಡ ಎಂಬ ಹಳ್ಳಿಯಲ್ಲಿ ನಾಲ್ವರು ಯೋಧರು ತೀರಿಕೊಂಡಿದ್ದರು. ಕುತ್‌ಖೇಡ ಗುರ್ಜರ್‌ ವಾಸವಿದ್ದ ಹಳ್ಳಿಯ ಪಕ್ಕದ ಹಳ್ಳಿ. ಆತನಿಗೆ ಆಗ 19 ವರ್ಷ. ಯುದ್ಧದಲ್ಲಿ ತೀರಿಹೋದ ಸೈನಿಕ ಬರೆದಿದ್ದ ಪತ್ರ ಆತನ ಅಂತಿಮ‌ ಸಂಸ್ಕಾರದ ಸಮಯದಲ್ಲಿ ಮನೆಯವರಿಗೆ ತಲುಪಿತು. ಇದನ್ನು ಕಂಡ ಗುರ್ಜರ್‌ಗೆ ತಕ್ಷಣವೇ ಉಪಾಯವೊಂದು ಹೊಳೆಯಿತು. ಅಂದಿನಿಂದ ಅವರು ಹುತಾತ್ಮರ ಕುಟುಂಬಕ್ಕೆ ಪತ್ರಗಳನ್ನು ಬರೆಯುವ ರೂಢಿ ಬೆಳೆಸಿಕೊಂಡರು.

ಕಾರ್ಗಿಲ್ ಯುದ್ಧದಲ್ಲಿ ತೀರಿಕೊಂಡ 527 ಸೈನಿಕರ ಮನೆಯ ವಿಳಾಸವನ್ನು ಹುಡುಕಿ ಅವರಿಗೆ ಪತ್ರವನ್ನು ಬರೆದರಷ್ಟೇ ಅಲ್ಲದೇ ಬೇರೆ ಬೇರೆ ಅಪಘಾತಗಳಲ್ಲಿ, ಭಯೋತ್ಪಾದಕ‌ ದಾಳಿಗಳಲ್ಲಿ ಹುತಾತ್ಮರಾದ ಯೋಧ ಕುಟುಂಬಗಳಿಗೂ ಪತ್ರವನ್ನು ಬರೆಯುತ್ತಿದ್ದಾರೆ.‌ ಇಲ್ಲಿಯವರೆಗೂ ಅವರು ಸುಮಾರು 4500 ಪತ್ರಗಳನ್ನು ಬರೆದಿರಬಹುದು. ‘ಪ್ರತಿ ಬಾರಿ ಪತ್ರ ಬರೆದಾಗಲೂ ಇದು ನನ್ನ ಕೊನೆಯ ಪತ್ರವಾಗಿರಲಿ ಎಂದು ಪ್ರಾರ್ಥಿಸುತ್ತೇನೆ’ ಎನ್ನುವ ಗುರ್ಜರ್ ಅವರು ಇತ್ತೀಚೆಗೆ ಬರೆದ ಕೊನೆಯ ಪತ್ರ ಪುಲ್ವಾಮಾದಾಳಿಯಲ್ಲಿ ಹತರಾದ ಸಿಆರ್‌ಪಿಎಫ್‌ನ ಕುಟುಂಬದವರಿಗೆ.

ಇದರ ಜೊತೆಗೆ ಗುರ್ಜರ್ ಅವರು ಸುಮಾರು 1500 ಯೋಧ ಕುಟುಂಬಗಳೊಡನೆ ಫೋನಿನ ಮೂಲಕ ಸಂಪರ್ಕದಲ್ಲಿದ್ದಾರೆ. ಗುರ್ಜರ್ ಅವರಿಗೆ ಈಗ ಹಲವು ಸೈನಿಕರ ಜೊತೆಗೂ ಸಂಪರ್ಕವಿರುವುದರಿಂದ ಆಗಾಗ ಸೈನಿಕರು ತಮ್ಮ‌ ಮಾಹಿತಿಯನ್ನು ಇವರಿಗೆ ಕಳುಹಿಸಿಕೊಡುತ್ತಾರೆ.

ವಿಕ್ರಮಘರ್ ಅಲಾಟ್‌ನಲ್ಲಿರುವ ಆತನ ಮನೆಯಲ್ಲಿ ಮೊದಲ ಮಹಾಯುದ್ಧದಲ್ಲಿ ತೀರಿಕೊಂಡ ಹುತಾತ್ಮ ಯೋಧರಿಂದ ಹಿಡಿದು ಸುಮಾರು 41,000 ಹುತಾತ್ಮರ ಕುರಿತ ಮಾಹಿತಿಯದೆ. 900 ಕೆ.ಜಿಯಷ್ಟು ಪತ್ರಿಕಾ ವರದಿಗಳು, ಫೊಟೊಗಳು, 61 ರಿಜಿಸ್ಟರ್ ಪುಸ್ತಕಗಳು ಅಲ್ಲಿವೆ. ಅದನ್ನು‌ ಶಹೀದ್ ಸಂಗ್ರಹಾಲಯ ಎಂದೇ ಕರೆಯಲಾಗುತ್ತದೆ.

ದೀಪಾವಳಿ ಗುರ್ಜ‌ರ್‌ ಅವರಿಗೆ ಬಿಡುವಿಲ್ಲದ ಸಮಯ.‌ ಈ ಸಮಯದಲ್ಲಿ ಅವರು ಹುತಾತ್ಮರ ಕುಟುಂಬದವರೊಡನೆ ಮಾತನಾಡುವ ಕೆಲಸವನ್ನು ಮಾಡುತ್ತಾರೆ. ಪ್ರತಿನಿತ್ಯ 30 ರಿಂದ‌ 50 ಕರೆಯನ್ನು ಸ್ವೀಕರಿಸುತ್ತಾರೆ. ಉಳಿದ ಸಮಯದಲ್ಲಿ ಸೈನಿಕರಿಗೆ ಸಂಬಂಧಿಸಿದ ಪತ್ರಿಕಾ ವರದಿ, ಫೋಟೊಗಳನ್ನು ಸಂಗ್ರಹಿಸುವ, ಅಂಟಿಸುವ ಕೆಲಸವನ್ನು ಮಾಡುತ್ತಾರೆ. ಅವರ ಮಗ ಹುಟ್ಟಿದ ವರ್ಷವೇ ಜಮ್ಮು-ಕಾಶ್ಮೀರದಲ್ಲಿ ಉಗ್ರರೊಡನೆ ಕಾದಾಡುತ್ತಾ ಯೋಧ ಹರ್ದೀಪ್ ತೀರಿಕೊಂಡಿದ್ದರಿಂದ ಮಗನಿಗೆ ಅದೇ ಹೆಸರನ್ನು‌ ಇಟ್ಟಿದ್ದಾರೆ.‌

ಹುತಾತ್ಮ ಯೋಧರ ಮನೆಯವರು ಇವರನ್ನು ಮನೆಗೆ ಆಹ್ವಾನಿಸುತ್ತಾರೆ. ಆದರೆ ತಿಂಗಳಿಗೆ 10,400 ರೂಪಾಯಿಯ ಆದಾಯ ಹೊಂದಿರುವ ಗುರ್ಜರ್ ಅವರಿಗೆ ಹೀಗೆ ಒಂದೆಡೆಯಿಂದ ಮತ್ತೊಂದೆಡೆ ಹೋಗುವುದೂ ಕಷ್ಟವೇ ಸರಿ. ಈತನಿಂದ ಪ್ರೇರಿತನಾದ ಇಂಜಿನಿಯರಿಂಗ್ ಓದುತ್ತಿರುವ ವಿದ್ಯಾರ್ಥಿಯೊಬ್ಬ ಹುತಾತ್ಮ ಕುಟುಂಬದವರಿಗೆ ಸುಮಾರು 400 ಪತ್ರಗಳನ್ನು ಬರೆದಿದ್ದಾರೆ. ಅಷ್ಟೇ ಅಲ್ಲದೇ,‌ ಅಮೆರಿಕಾದಲ್ಲಿ ವ್ಯಾಪಾರ ಮಾಡುತ್ತಿರುವ ಭಾರತೀಯನೊಬ್ಬ ಗುರ್ಜರ್ ಅವರ ಸೂಚನೆಯ ಮೇರೆಗೆ ಸುಮಾರು 20 ಹುತಾತ್ಮ ಯೋಧರ ಮಕ್ಕಳ ಶಿಕ್ಷಣಕ್ಕೆ ಸಹಾಯವನ್ನೂ ಮಾಡುತ್ತಿದ್ದಾರೆ.‌

Click to comment

Leave a Reply

Your email address will not be published. Required fields are marked *

Most Popular

To Top